ACID VALPROIC
Formë doza: Tableta 300 mg, dhe 500 mg; Flakon 380 mg/ 10 ml-150 ml
Emri gjenerik: Acid Valproic
Emri Tregëtar: Navarin XR
Indikacionet dhe kriteret e përdorimit: Antiepileptik i serisë së parë: Epilepsia parciale, epilepsia e gjeneralizuar në mënyrë primare dhe sekondare. Si normalizues humori në Çrregullimet bipolare I e II, Çrregullimi bipolar i paspecifikuar, Çrregullimet Depresive; Çrregullimet obsesivo-kompulsive refraktare; si terapi shtesë me antipsikotikët në Skizofreninë Refraktare, Çrregullimet e personalitetit, Çrregullimet Somatoforme dhe në Çrregullimet psikotike dhe të humorit të shkaktuara nga sëmundje mjekesore/neurologjike të përgjithshme. Gjithashtu përdoret në Çrregullimet e dhimbjes dhe Cefaletë, nëse e gjykon specialisti (psikiatër dhe neurolog).
Kundërindikacionet: Sëmundje aktive të heparit, histori familjare për disfunksion të rëndë hepatik hipersensibilitet ndaj principit aktiv; Trombocitopenitë, Vaskulitet dhe anomalitë e koagulimit; Shtatzani. KUJDES: në vajzat e reja bëhet monitorim për polikistozën ovariale, rekomandohet Echo gjinekologjike çdo një vit.
Efektet anësore: Mund të shfaqen më shpesh gjatë periudhës së parë të përdorimit: irritim gastrik, nausea, ataksi, tremor, hiperamoniemi, shtim oreksi dhe rritje në peshë, rënie e flokëve (kalimtare), edema, trombocitopenia dhe frenim i agregimit trombocitar, prekje e funksionit hepatik, amenorea, rash kutan, rrallë pankreatit, leukopeni, hipoplazi eritrocitare, çrregullime menstruale, polikistozë ovariale, gjinekomasti.
Doza dhe mënyra e perdorimit: Për të rriturit: fillohet 250 – 500 mg në ditë, duke bërë një periudhë titrimi me rritje rreth 250 mg çdo 4-5 ditë deri në një total 20-40 mg kg peshë. Nuk preferohet kalimi i një doze mbi 1500-2000 mg\ditë. Doza maksimale 3000 mg/ ditë. Në raste te vecanta rekomandohet matja e niveleve plazmatike.
Varianti chrono që përmban valproat natriumi dhe acid valproik lejon fraksionimin e dozës ditore në dy marrje, ndërsa varianti i thjeshtë kërkon ndarjen në 3 marrje ditore, pas ushqimit. Për fëmijet me peshë mbi 20 kg: Mjekimi fillohet me 400 mg në ditë, ose dozë 20-30 mg/kg peshë/dit, max. 35-40 mg/kg/peshë. Për fëmijët me peshë deri në 20 kg mjekimi fillohet me 20 mg/kg e ndarë në disa marrje dhe mund të rritet por për doza më të mëdha se 40 mg/kg duhet të monitorohen parametrat hematologjike dhe biokimike.
Kohëzgjatja e mjekimit: Për fillimin, vazhdimin/ndërprerjen e mjekimit është i nevojshëm mendimi i Psikiatrit për diagnozat Psikiatrike të përmenduara te indikacionet dhe i Neurologut (mundësisht në punktin e epilepsive Shërbimi Universitar i Neurologjisë) për diagnozat Neurologjike të përmendura te indikacionet. Mjekimi mund të vazhdojë për periudha të gjata, në varësi të numrit të episodeve, formës së sëmundjes dhe efikasitetit apo tolerancës së barit. Këshillohet ndërprerja edhe e menjëhershme në rast se shfaqen efekte të rënda anësore.
Komentet